Repaso autoliterario a 2019

Este ano foi intenso en canto a produción literaria, empezando coa publicación do meu primeiro libro en castelán, a novela curta de ciencia-ficción Memoria de Nosotros, e xunto a ela chegaron tamén en castelán os relatos La danza de los tres soles (que pode ademais escoitarse como audiorrelato) e La puerta del norte, integrado no volume nadalicio dixital Maravillosa Navipuaj. A carón deles, en galego publicouse no último número da revista de relatos Contos Estraños Sete anos menos un día, que nos fala de "Visitantes de alén da morte".
E 2020 promete ser, cando menos, igual de intenso. 
Ímonos lendo!

Novidades deste decembro, acabadas de saír do forno


Sorteo de NINGUÉN LEMBRA

O 1 de setembro comeza o curso máxico segundo o calendario potteriano, e este ano na lista inclúese como lectura escolar Ninguén lembra, a novela de Vanesa Santiago que permite coñecer ás bruxas e magos maérfilos, posuidores dos cinco dons dos antigos. 

A fortuna acompáñate, porque velaquí chega un sorteo do libro para a xente amiga do fantástico. Vai explicado por pasos:

PARTICIPA NO SORTEO: Queres que Ninguén lembra sexa teu? Comenta neste post ou cítame en twitter co cancelo #sorteoninguenlembra antes do 1 de setembro de 2019 e entra no bombo, e aproveita para contarme que che gusta da literatura fantástica ou cal é o teu libro/saga favorito do xénero. 

APOIA A LITERATURA FANTÁSTICA: Queres colaborar coa literatura fantástica? Sigue as contas en redes sociais de editoras que a fan posible e que fixeron posible que as miñas historias extraordinarias viran a luz. Aquí engado a ligazón en twitter.


RECENSIONA NINGUÉN LEMBRA: Queres recensionar un exemplar en papel de Ninguén lembra sen sorteo? Teño dous libros máis preparados para este fin. Escríbeme a ninguenlembra@gmail.com antes de que se esgoten! 

Nada máis doado para que un exemplar de Ninguén lembra poida ser teu! 


O sorteo realizarase o 1 de setembro, coincidindo co inicio do curso máxico, e está limitado a persoas residentes en España. Ao gañador ou gañadora requirireille os datos persoais para poder enviarlle o libro. Non almacenarei eses datos en ningures.

Que a maerfilia corra polas túas veas!


Estreando novela curta

Preséntovos a miña nova novela curta e primeira en castelán, "Memoria de Nosotros". Évos un relato de ciencia ficción que pode lerse nun par de horiñas e atópase dispoñible na web de Impresiones privadas en versión dixital polo módico prezo de 1'95€. Espero que vos guste!

Pasádevos tamén se podedes polas demais publicacións deste proxecto literario tan riquiño e veredes cantas alfaias agochan. Non vos decepcionarán!



Homes grises, vencereivos!

Nunca na miña vida me ocorrera tal cousa: non sei como xestionar o meu tempo. Quero cultivar un milleiro de ideas e participar nun cento de actividades, e atópome con que non podo. Os homes grises levaron con eles o meu lecer, e o persoal e o laboral conflúen nun istmo de baleiro creativo onde rescato a escrita coma quen mergulla ata o fondo das rías sen osíxeno: con dificultade. O mesmo que baixo do mar conta cada segundo, para min conta cada letra que vou esculpindo e modelando, que a tal ritmo cheguei. E, malia todo, arranxei para, neste tempo, escribir unha traxedia e unha road-novel -novela curta de viaxe por estrada- fantástica (e neste intre inéditas), recuperar e dar forma a textos que gardaba no fondo do faiado, e procurar saída a un par de paranoias de ciencia-ficción que estarán en vindeiros meses a pública disposición. Tic-tac, xa me tardan! Ademais, vai para medio ano que, para o meu abraio, comparto espazo no papel xunto a xente da mestría literaria como son Andrea Barreira, Antón Riveiro Coello, Anxos Sumai, Helena Villar Janeiro, Inma López Silva, Marilar Aleixandre, Rosalía Fernández Rial, e Xabier López López, congregada baixo o chamado do editor Francisco Castro para escribir sobre a nosa paixón, parindo un impresionante volume titulado O LIBRO DOS LIBROS. Esa paixón da que falo, acho que queda perfectamente definida no título... Libros! Librarías! Bibliotecas! Páxinas perladas de letras!  Amantes da lectura e dos seus misterios...





A escritora Antía Yáñez xa forma parte do palmarés do Illa Nova

Cruce de sensacións neste día completo, signiticativo 14 de abril, entre unha mañá bibliotecaria de contos e cantos, un emocionante xantar de celebración e despedida, e unha viaxe a Vigo. Unha viaxe feliz, de morriña, de espera, de curiosidade, e de encontros. Por fin teño compañeira de palmarés do Premio Illa Nova de Narrativa de Galaxia. E con enorme ilusión lle entreguei onte en Vigo o galardón que a acredita como gañadora do Illa Nova 2018. Ela é Antía Yáñez, e promete unha novela forte, "Senlleiras", protagonizada por mulleres en loita contra a violencia machista. Mellor relevo, imposible. Outra vez máis, en hora boa, Antía!

Antía Yáñez co galardón do Illa Nova 2018, obra de Basilisa Fiestras, e o cheque. Non podía deixar de aplaudir. Parabéns! Imaxe de Editorial Galaxia.